الرئيسية
موضوع: طاجن العكاوى جربيه ومش هتبطلى تعمليه .... 
السلام عليكم ورحمه الله وبركاته
كل سنة وانتم طيبين وبالف خير وربنا يبلغنا رمضان والكل بخير
انا كل فتره لازم ادخل بمشاركه ف المطبخ ومش اى مشاركه متواضعه انا لالالازم انتشر ف فتكات فكل قسم
ربنا يخلى فتكات واعضاء فتكات
وصفتى اليوم هى طاجن عكاوى طبعا كتير بيقولوا يع ومش باكلها ومش حلوه ومش هطبخها انا كنت زيكم
وشفت طريقه بكتاب الشيف اسامه وقلت ل نفسى انا فتوكه انا اللى هخترع الطاجن انا اخدت التكه والباقى فتكتك تشتغل وفعلا عملته ومن يومها بقى من ضمن وجبتنا وجوووزى بيموت فيه وبيطلبه بالطلب طبعا فى ناس هتقول احنا عارفين ليه الرجال بتحب العكاوى احم احم
هو بيحبها من طعمها الوااااااااو
بدل الرغى ده كله جربوها على ضمنتى ومش هتندموا هترجعوا تدعوولى كمان
المقااادير
احنا هنحتاج عكاوى حسب الاشخاص اللى عندك تحددى الكميه بالخضار والعكاوى
وخضار ( بطاطس - جزر - طماطم - بصل - توم - فلفل - عودين كزبره وكرفس وشبت وبقدونس - بصل صغير جدا
2 معلقه كبيره سكر - 2 دقيق - ملح وفلفل ومعلقه زعتر ))
الطريقه
اعزرونى بقى انا تعبت ف التصوير والتعديل وصورت على قد ماقدرت ابنى كان مدوخنى والله
اول شى هتجيبى العكاوى وتغسليها كويس وتتبليها كويس بالملح والفلف الاسمر ومعلقتين الدقيق
وتسبيهم على الاقل نص ساعه وبعدين تحمريها ف الزيت نص تحميره
فى النص ساعه دى هتكونى فى حلتك قطعتى البصله والطماطم وفصين التوم والبطاطس والجزر وقرن الفلفل وعليهم رشه ملح وفلفل وتغطيهم بالميه يادوب يتغطوا بس ))الشيف عملها بجزر بس ))
وهنا بقى التكه اللى عرفتها بقعه شاشه نضيفه تحطى عودين كرفس وكزبره وشبت وبقدونس وواحده لورى وحبهان
ومعلقه زعتر وتلفيها كويس وتربطيها وتحطيها مع الخضار وع النار يادوب يغلى بس
البصل الصغير اهو لو اصغر يبقى افضل
هنا بقى هتحمرى البصل الصغير فى معلقتين السكر
هتحطى السكر ف الطاسه
واول مايبقى كرميل تنزلى بالبصل والنار هاديه وتسبيه يتحمر ف السكر وتتكون قشره على البصله
بجد بتدى طعم تحفا ومش مسكرررر للى بتسال
هتضيفى كل المحتويات ف برام (( طاجن )) البصل و العكاوى وعليهم الخضار
هنا بعد ماخلصت لقيت صاحب جوزى اتصل وقاله عكاوى غدايه عليك وعملت طاجن تانى
هنا ف الفرن بقى وبتاخد على الاقل ساعه ونص على درجه 180 وتغطيها بفويل او غطا
وعدين تشيليه وتسبيه ربع ساعه يتحمر وشه
وبالهنا والشفا
امانه عليكم دعوه حلوه بصلاح الاحوال ويشفى ابنى ويخليه ليا
وربنا مايحرمنى منكم ابدااا
