ازيكم يا فتوكاتى يا حبيباتى

لعلكم بخير جميعا باذن الله ..


بما انى باحب اطبق وصفات أستاذتنا الرائعه

منال العالم

بارك الله فيها

عملت من فترة الدجاج بالكيس الحرارى وحبيت اشارككم بالطريقه
هى سهله جدا ومن مميزاتها ان الكيس الحرارى بيساعد على النضج اسرع من الفويل والصوانى
وكمان بيكون اللحم طرى جدا وناعم سواء لحوم او دجاج

وسبق وطبقت وصفة حبيبتنا العسوله جوجو نونو لعرق الروستو (اللحمه البارده )
فى الكيس الحرارى
وكانت هايله جدا تسلم يمناكى يا احلى جوجو بارك الله فيكى

وعملت بفضل الله النهارده كفتة الدجاج بالجبن وكانت رائعه جدا ماشاء الله
وهنشوفها المشاركة التانيه باذن الله

نبدأ بسم الله ونشوف المكونات ....

كيلو دجاج (انا عملت كيلو ونص لفرخه ونص )
الفرخه قاعدة متربعه احتراما ليكم عشان تقيموها يالا ماتزعلوهاش


بصله كبيرة مفرومة ناعم وعليها ملح وفلفل و عصير ليمونه كبيرة(عشان تنزل ميتها )

1 م ك خل - 3 م ك زيت زيتون او ذرة
2م ص كارى -1م ص بابريكا حلوة - ربع م ص شطه - 1/2 م ص كركم
1م ص من كسبرة ناعمة - كمون - جنزبيل -بهارات دجاج -ملح - بهار مشكل



المفروض ان الوصفه فيها توم وجنزبيل فريش وفلفل اخضر

انا استغنيت عنهم وحطيت البصله وجنزبيل بودرة وممكن توم بودرة لو حبيتى


نحط الزيت والخل وجزء من ماء البصل على التوابل كلها وتبقى بالشكل ده


نعمل مساج للفرخه الحلوة دى بنص كمية التوابل وندلكها كويس جدا زى العروسه
بين الجلد واللحم ومن الداخل والخارج


الجزء الباقى من التوابل حطيت عليه البصله وكررت تانى المساج ودلعتها جدا
وخليتها فى التلاجه من بالليل للصبح عشان تبقى فله شمعه منورة وريحتها تجنن



هنحضر الخضار حسب الرغبه
جزر صغير - بطاطس ارباع - بصله مفرومة خشن - حبة طماطم وممكن كوسه
الخضار بيكون حجمة كبير عشان ما يتهريش



وده النوع اللى استعملته اسمة لوك فيه 5 اكياس ب 11ريال


هنحط كل اللى عملناه فى الكيس بدون اى حاجه لادهون ولا دقيق
ونحط فى داخل الفرخه جزء من الخضار والبصل
ونحط الكيس فى صينيه عاليه الحواف ونقفل الكيس بالقفل المخصص ونقص الزياده
ونقص الكيس من فوق او نخرمة بالسكينه من فوق فقط باكرر تانى اهو
عشان نسمح بخروج البخار و هتلاحظى ان الكيس انتفخ جدا فى الفرن






هندخله الفرن الرف الاسفل نص ساعه وبعدين تهدى النار وتسيبيه ساعه كمان
يعنى ساعه ونص ويكون جاهز ان شاء الله
لو الفرخه اقل من كيلو يبقى الوقت اقل


هنا بعد النضج الحمد لله وواضح ان الورك اتحمر داخل الكيس
لكن انا كنت عاوزة احمرها كلها
فتحت الكيس ودخلتها تانى تحت الشوايه تحمر 5دقايق



وده شكلها بعد ما اتحمرت تماما والريحه تجنن ماشاء الله



ونقلتها لطبق التقديم وحواليها الخضار






ومعاها ارز بالشعريه وسلطة خضراء
بس الشعريه لسعت ما تركزوش عليها غمضوا عنيكم





ودى النهايه ان شاء الله وتوتة توتة فرغت الحدوته
لو عجبتكم قيموا عشان اجيبلكم ملتوته

وصلوا على الحبيب المصطفى عليه افضل الصلاة والسلام لشغل الوقت
لغاية ما اكمل المشاركة القادمة باذن الله
كفتة الدجاج بالجبن لمنال العالم